SANTRI YANG JALAN KAKI, ENTE YANG ENCOK

Ane sebenarnye kasian banget sama ente. Tetangga beli kulkas baru, ente yang kedinginan. Tetangga punya kompor baru, ente kepanasan. Tetangga beli motor baru, ente cikaan ( masuk angin. ) Kapan bahagianye?

Emang sih ane ngeliat ente girang banget sampai lari keliling kampung ngakak sendirian sewaktu temen-temen ane dituduh makar. Sewaktu polisi ngelarang bus ngangkut demo, ente juga jingkrak-jingkrak sampai kecebur got. Kalau nggak ane tolongin, dari waya dur sampe waya titot ente berendem terus di got.

Pas tahu temen-temen ane urang sunda jalan kaki, ente ketawa ngakak sampe keselek. Kan ane yang ngasih air minum. Abisan ngeri banget ngeliat ente melotot kaya orang kesurupan

Lha, kemaren ente jadi meriang pas nonton di tivi pak pulisi main cap cip cup sama habaib. Ane bawain obat turun panas ente malah nutup pintu.

Ane kira ente udah sembuh sewaktu pagi-pagi dateng ke rumah ane. Eh, sempet-sempatnya ente ngamuk-ngamuk marahin para santri yang jalan kaki. Emangnye mereka salah ape? Lha yang jalan kaki aje nggak berasa pegel, kok malah ente yang encok? Ente nuduh Pak Kyai nyiksa santrinye. Lha, emangnye ente pernah nyumbang ape ke pondok pesantrennye?

Lagian dengkul santri beda jauh sama dengkul ente. Coba deh, ente bolak balik ke pasar jalan kaki, kalau ente sanggup, ane beliin motor,beneran nih. Lha ente masih main bola plastik, para santri mah mainnya bola api.

Ente berani maki-maki para santri yang jalan kaki kan karena ente kebal UU ITE. Ngaku aja deh. Kalau ane yang ngomel kaya gitu, bisa nemenin Buni Yani.

Mendingan ente pulang tidur deh, ane denger ente belon punya kartu BPJS, ntar penyakit ente tambah parah, dokternya mau ente bayar pake ape?

Bilangin sama anak bini ente. Pas nanti tanggal 2 Desember jangan ngidupin tivi, hape cabut beterenya, kalau perlu buang, atau kasih ane juga ane nggak nolak. Kalau ente nggak dengerin saran ane ini, ane nggak tanggung jawab kalau ente mati suri. Tapi tetep aje sebagai tetangge ane ikutan repot. Habisan sih ente demennya repot sendiri. Ngajak-ngajak nape